Šaltinis
Puslapis
Žodžio numeris
Faksimilė:

 

Welche aber groſſe beſchwerung des Gewi=
ſſens haben / oder betruͤbt vnd angefochten ſind / die
wird ein Beichtuater wol wiſſen mit mehr Spruͤ=
chen zu troͤſten / vnnd zum Glauben reytzen.
Das ſoll ein gemeine weiſe der Beicht ſein / fuͤr die
einfeltigen.
Das Sacrament
Des Altars / Wie ein Haußuat=
ter daſſelbige ſeinem Geſin=
de einfeltigklich fuͤr=
halten ſoll.
Was iſt das Sacrament des
Altars? Antwort.
Es iſt der ware Leib vnd Blut vnſers HERrn
Jheſu Chriſti / vnter dem Brodt vnnd Wein / Vns
Chriſten zu Eſſen vnnd zu Trincken vonn Chriſto
ſelbs eingeſetzt.
Wo ſtehet das geſchrieben?
Antwort.
So ſchreiben die Heiligen Euangeliſten / Mat=
theus / Marcus / Lucas / vnnd Sanct Paulus.